សារព័ត៌មានខ្មែរថែម៖ ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីចំនួន ៥២,៧២លានដុល្លារ សម្រាប់គម្រោងពង្រីកបណ្តាញអគ្គិសនីនៅកម្ពុជា។ គម្រោងនេះនឹងពង្រឹងបណ្តាញបញ្ជូនរបស់ប្រទេសកម្ពុជាដើម្បីធ្វើសមាហរណកម្មថាមពលកកើតឡើងវិញបន្ថែមទៀតទៅក្នុងបណ្តាញជាតិ និងជួយបំពេញតម្រូវការអគ្គិសនីដែលកំពុងកើនឡើងជាមួយនឹងថាមពលស្អាត និងផលិតក្នុងស្រុក។

កម្ពុជាបានពង្រីកការផលិតអគ្គិសនីក្នុងស្រុករបស់ខ្លួនយ៉ាងឆាប់រហ័ស ដោយបង្កើន​​​​​ទិន្នផលទ្វេដងពី ៨,៦៨ តេរ៉ាវ៉ាត់ម៉ោង (TWh) ក្នុងឆ្នាំ២០២០ ​​​ដល់ ១៧,៨៥ TWh ក្នុងឆ្នាំ២០២៤។ ក្នុងរយៈពេលដូចគ្នានេះ ការពឹងផ្អែកលើអគ្គិសនីដែលបាននាំចូលបានធ្លាក់ចុះពី ៣,០៦ ទៅ ១,៥៧ TWh ។ វឌ្ឍនភាពនេះឆ្លុះបញ្ចាំងពីការពឹងផ្អែកលើខ្លួនឯងនៃថាមពលដែលកំពុងកើនឡើងរបស់ប្រទេស និងសក្តានុពលនៃប្រភពកកើតឡើងវិញ ដើម្បីគាំទ្រដល់គោលដៅអភិវឌ្ឍន៍របស់ខ្លួន។

លោកស្រី Jyotsana Varma នាយិកា ADB ប្រចាំកម្ពុជាបានមានប្រសាសន៍ថា “អគ្គិសនីដែលដែលតម្លៃសមរម្យនិងអាចទុកចិត្តបាន គឺជាឆ្អឹងខ្នងនៃការរីកចម្រើនរបស់ប្រទេសកម្ពុជា”។ គម្រោងនេះគឺលើសពីការកសាងខ្សែបញ្ជូន វាគឺជាការភ្ជាប់ទំនាក់ទំនងមនុស្ស សាលារៀន មន្ទីរពេទ្យ និងអាជីវកម្មទៅកាន់អនាគតថាមពលស្អាត និងធន់ជាងមុន។ តាមរយៈការនាំយកថាមពលកកើតឡើងវិញកាន់តែច្រើនទៅក្នុងបណ្តាញ កម្ពុជាអាចផ្គត់ផ្គង់ថាមពលដល់ប្រជាជនរបស់ខ្លួន ខណៈការពារបរិស្ថានសម្រាប់មនុស្សជំនាន់ក្រោយ។

បណ្តាញអគ្គិសនីរបស់កម្ពុជាត្រូវបានសាងសង់ឡើងសម្រាប់ថាមពលធម្មតា ហើយឥឡូវនេះត្រូវការការពង្រីកដើម្បីគ្រប់គ្រងថាមពលព្រះអាទិត្យ និងខ្យល់ដែលកំពុងកើនឡើង។ គម្រោង​នេះ​នឹង​សាងសង់​ខ្សែ​បញ្ជូន​ថាមពល​អគ្គិសនី ២៣០ គីឡូវ៉ុល​ ប្រវែង ៥៥ គីឡូម៉ែត្រ​រវាង​ខេត្ត​ពោធិ៍សាត់ និង​កំពង់ឆ្នាំង និង​កែលម្អ​ស្ថានីយ​រង​ចំនួន ៩ នៅ​ទូទាំង​ប្រទេស។ ការវិនិយោគទាំងនេះនឹងពង្រឹងសមត្ថភាពបញ្ជូនថាមពលដើម្បីផ្តល់ថាមពលកកើតឡើងវិញទៅកាន់តំបន់ដែលមានតម្រូវការទូទាំងប្រទេស បង្កើនភាពជឿជាក់ និងលើកទឹកចិត្តដល់ការវិនិយោគឯកជនកាន់តែច្រើន។

ស្របតាមផែនការមេអភិវឌ្ឍន៍វិស័យថាមពលនៅកម្ពុជា (២០២២-២០៤០) និងគោលនយោបាយជាតិស្តីពីប្រសិទ្ធភាពថាមពល (២០២២-២០៣០) ដោយគម្រោងនេះនឹងជួយកាត់បន្ថយការបាត់បង់ការបញ្ជូន និងលើកកម្ពស់សន្តិសុខថាមពល។

ADB គឺជាធនាគារអភិវឌ្ឍន៍ពហុភាគីឈានមុខគេដែលគាំទ្រដល់កំណើនប្រកបដោយភាពធន់ និងចីរភាពនិងបរិយាបន្ននៅទូទាំងអាស៊ី និងប៉ាស៊ីហ្វិក។ ដោយធ្វើការជាមួយសមាជិក និងដៃគូរបស់ខ្លួន ដើម្បីដោះស្រាយបញ្ហាប្រឈមដ៏ស្មុគស្មាញរួមគ្នា ADB ប្រើប្រាស់ឧបករណ៍ហិរញ្ញវត្ថុប្រកបដោយនវានុវត្តន៍ ដើម្បីផ្លាស់ប្តូរជីវិត និងការពារភពផែនដីរបស់យើង។

ប្រភព៖ www.khmertimeskh.com