កម្ពុជាថ្មី: ទ្រព្យសកម្មសរុប របស់វិស័យហិរញ្ញវត្ថុមិនមែនធនាគារនៅកម្ពុជា បានកើនពីជាង ៣ ពាន់លានដុល្លារ ក្នុងឆ្នាំ ២០២១ រហូតដល់ជាង ៩ ពាន់លានដុល្លារ ត្រឹមឆ្នាំ ២០២៥ ដែលស្មើនឹងប្រមាណជាង ១៨% នៃផលិតផលក្នុងស្រុកសរុប។ នេះបើតាមប្រសាសន៍របស់លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ។
លោក អូន ព័ន្ធមុនីរ័ត្ន បានលើកឡើងនៅក្នុងវេទិកាផ្សព្វផ្សាយសមិទ្ធិផលអាណត្តិទី១ របស់អាជ្ញាធរសេវាហិរញ្ញវត្ថុ មិនមែនធនាគារ និងសន្និសីទមូលបត្រប្រចាំឆ្នាំ ២០២៦ នៅថ្ងៃទី ២៩ កញ្ញា ២០២៦ នៅសណ្ឋាគារសុខា។ ចំនួនការងារក្នុងវិស័យហិរញ្ញវត្ថុមិនមែនធនាគារបានកើនពី ៨ ពាន់នាក់ ក្នុងឆ្នាំ ២០២១ រហូតដល់ប្រមាណ ១៦ ពាន់នាក់ ក្នុងឆ្នាំ ២០២៥ ពោលគឺកើនទ្វេដង។
លោក អូន ព័ន្ធមុនីរ័ត្ន មានប្រសាសន៍ថា កំណើនទ្រព្យសកម្មវិស័យហិរញ្ញវត្ថុមិនមែនធនាគារ ឆ្លុះបញ្ចាំងឱ្យឃើញពីការរីកលូតលាស់ ជាបន្តបន្ទាប់នៃវិស័យហិរញ្ញវត្ថុមិនមែនធនាគារ ក្នុងការគាំទ្រសកម្មភាពសេដ្ឋកិច្ច និងការវិនិយោគ ព្រមទាំងក្នុងការជំរុញការអភិវឌ្ឍសង្គម-សេដ្ឋកិច្ចជាតិ។
ការកើននូវចំនួនការងារជាសញ្ញាល្អ ហើយចំណុចដែលកាន់តែប្រសើរគឺការអភិវឌ្ឍ និងលើកកម្ពស់នូវចំណេះដឹង ជំនាញបច្ចេកទេស និងវិជ្ជាជីវៈក្នុងវិស័យដ៏សំខាន់ ដែលបានរួមចំណែកក្នុងការអភិវឌ្ឍទីផ្សារការងារផ្នែកហិរញ្ញវត្ថុនៅកម្ពុជា។
វិស័យហិរញ្ញវត្ថុមិនមែនធនាគារ បានរួមចំណែកពង្រីកការ-គាំពារសង្គម និងភាពធន់ផ្នែកហិរញ្ញវត្ថុ របស់ប្រជាពលរដ្ឋ តាមរយៈប្រព័ន្ធសន្តិសុខសង្គម និងផលិតផលធានារ៉ាប់រង, បានបង្កើតឱកាសវិនិយោគ និងគាំទ្រការកៀរគរមូលធន តាមរយៈទីផ្សារមូលបត្រ, បានបង្កើតក្របខណ្ឌគតិយុត្តដ៏រឹងមាំ សម្រាប់ការគ្រប់គ្រងទ្រព្យ-សម្បត្តិ និងការរៀបចំរចនាសម្ព័ន្ធវិនិយោគ តាមរយៈសេវាបរធនបាលកិច្ច, បានពង្រឹងគុណភាព និងភាពជឿជាក់នៃព័ត៌មានហិរញ្ញវត្ថុ, អភិបាលកិច្ចសាជីវកម្ម និងគណនេយ្យ-ភាព តាមរយៈការអភិវឌ្ឍវិស័យគណនេយ្យ និងសវនកម្ម, និងបានគាំទ្រដល់តម្រូវការ ហិរញ្ញប្បទានបន្ទាន់ និងការអភិវឌ្ឍលំនៅឋានសមរម្យ តាមរយៈវិស័យអចលនវត្ថុ និងបញ្ចាំ។
ការរីកចម្រើនអស់ទាំងនេះ បានជួយបង្កើនជម្រើស និងឱកាសសម្រាប់ប្រជាពលរដ្ឋ, ម្ចាស់អាជីវកម្ម និងវិនិយោគិន, ព្រមទាំងបានរួមចំណែកពង្រឹងបរិយាកាសធុរកិច្ច និងការអភិវឌ្ឍសង្គម-សេដ្ឋកិច្ចកម្ពុជា៕
ប្រភព: https://www.kampucheathmey.com
