សារព័ត៌មានថ្មីថ្មី៖ រយៈពេល១ខែពេញ នៃយុទ្ធនាការ «១ម៉ឺនរៀល ១ម៉ឺននាក់» មូលនិធិគន្ធបុប្ផា កម្ពុជា ទទួលបានថវិកាបរិច្ចាគប្រមាណ ៦ ៣៨២ ០០០ ដុល្លារ ពីសប្បុរសជនសរុបជាង ៣៥ម៉ឺននាក់។ លោកស្រី ពេជ ចន្ទមុន្នី ប្រធានកិត្តិយសនៃមូលនិធិគន្ធបុប្ផាកម្ពុជា បានបង្ហាញតួលេខនេះ តាមរយៈទំព័រហ្វេសប៊ុក។
ក្នុងនាមជាប្រធានកិត្តិយសនៃមូលនិធិគន្ធបុប្ផាកម្ពុជា លោកស្រី ពេជ ចន្ទមុន្នី បានអរគុណ ចំពោះទឹកចិត្តរបស់សប្បុរសជន ដែលបានចូលរួមបរិច្ចាគក្នុងយុទ្ធនាការ«១ម៉ឺនរៀល ១ម៉ឺននាក់» ដើម្បីជួយសង្រ្គោះកុមារកម្ពុជា។ លោកស្រី ពេជ ចន្ទមុន្នី ក៏បានអំពាវនាវឱ្យ សប្បុរសជននានា បន្តបរិច្ចាគថវិកាជូនមន្ទីរពេទ្យគន្ធបុប្ផា ទោះជាយុទ្ធនាការនេះ បិទបញ្ចប់ក៏ដោយ។
លោកស្រី ពេជ ចន្ទមុន្នី បានរៀបរាប់ដូច្នេះ៖«មូលនិធិគន្ធបុប្ផាកម្ពុជា នៅតែត្រូវការ ការចូលរួមបរិច្ចាគពីពុកម៉ែ បងប្អូន និងព្រះសង្ឃគ្រប់ព្រះអង្គ ដើម្បីឱ្យមន្ទីរពេទ្យគន្ធបុប្ផាអាចនៅបន្តបេសកកម្ម នាំភាពញញឹម និងក្ដីសង្ឃឹមដល់ទារក និងកុមារនៅកម្ពុជា»។
សូមជម្រាបថា កាលពីឆ្នាំ២០២៥ យុទ្ធនាការ «១ម៉ឺនរៀល ១ម៉ឺននាក់» ទទួលបានថវិកា បរិច្ចាគចំនួន ៥,៥លានដុល្លារ ពីសប្បុរសជនប្រមាណ៣០ម៉ឺននាក់។ ក្នុងមួយឆ្នាំៗមន្ទីរ ពេទ្យគន្ធបុប្ផា ត្រូវចំណាយថវិកាប្រមាណ៤៣លានដុល្លារ ក្នុងបេសកកម្មសង្គ្រោះជីវិត ទារក កុមារ និងស្រ្តីមានផ្ទៃពោះ។ ដើម្បីធានានូវនិរន្តរភាព ក្នុងការជួយសង្គ្រោះជីវិតទារកនិងកុមារកម្ពុជា គឺទាមទារចំបាច់ការចូលរួមបរិច្ចាគពីសប្បុរជនគ្រប់រូប។
ចាប់តាំងពីដំណើរការឡើងវិញនៅឆ្នាំ១៩៩២ មកទល់ដើមឆ្នាំ២០២៥ មន្ទីរពេទ្យគន្ធបុប្ផា ពិនិត្យ និងព្យាបាលផ្នែកពិគ្រោះជំងឺក្រៅដល់កុមារ និងស្រ្តីមានផ្ទៃពោះ បានប្រមាណ ២៣លាននាក់ ទទួលព្យាបាលកុមារដែលកើតជំងឺធ្ងន់ធ្ងរបានប្រមាណ២,៨លាននាក់ និងសម្រាលកូនជូនស្រ្តីមានផ្ទៃពោះ បានប្រមាណ ៤១ម៉ឺននាក់ ដោយឥតគិតថ្លៃ៕
ប្រភព: https://thmeythmey.com
