សារព័ត៌មានថ្មីថ្មី៖ ក្រសួងសេដ្ឋកិច្ច និងហិរញ្ញវត្ថុ ប្រកាសបន្តលើកលែង និងអនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ (លំនៅឋាន ឬអគារសហកម្មសិទ្ធិ) ដែលមានតម្លៃក្រោម ឬស្មើ ឬលើស ៧ ម៉ឺនដុល្លារ និង ២១ ម៉ឺនដុល្លារ រហូតដល់ដំណាច់ឆ្នាំ២០២៦។ រដ្ឋសម្រេចបែបនេះ គឺដើម្បីជួយសម្រួលដល់ប្រជាពលរដ្ឋដែលទិញលំនៅដ្ឋានពីក្រុមហ៊ុនអភិវឌ្ឍន៍នានា។
បើតាមសេចក្តីជូនដំណឹងរបស់ក្រសួងសេដ្ឋកិច្ច ដែលចុះនៅថ្ងៃទី១៦ ខែមករា ការលើកលែងពន្ធប្រថាប់ត្រាលើការផ្ទេរកម្មសិទ្ធិកាន់កាប់អចលនទ្រព្យនេះ គឺទាំងសម្រាប់អ្នកទិញលំនៅឋាន និង/ឬ ផ្ទេរកម្មសិទ្ធិជាលើកដំបូង (First-Time Home Buyer) រួមទាំងបុគ្គលទាំងឡាយណាដែលទិញលំនៅឋានមានលក្ខណៈជាបុរី ឬ ខុនដូ ក្នុងឆ្នាំ២០២៦។
ក្រសួងសេដ្ឋកិច្ចបានបញ្ជាក់ថា ការលើកលែងនិងការអនុគ្រោះពន្ធប្រថាប់ត្រាលើការផ្ទេរកម្មសិទ្ធិកាន់កាប់អចលនទ្រព្យនេះ គឺពុំមានអានុភាពប្រតិសកម្មចំពោះប្រាក់ពន្ធ រួមទាំង ទណ្ឌកម្មរដ្ឋបាល (ពន្ធបន្ថែម និងការប្រាក់) ដែលបានបង់រួចហើយនោះទេ។
អចលនទ្រព្យ ជាអនុវិស័យមួយនៅកម្ពុជាដែលបន្តងើបវិញយឺតនៅក្នុងឆ្នាំ២០២៦។ បើតាមការវាយតម្លៃរបស់ក្រសួងសេដ្ឋកិច្ច នៅក្នុងអនុវិស័យនេះ ចរន្តទិញ-លក់ ដែលសកម្មនោះ គឺលំនៅឋានថ្លៃសមរម្យ សកម្មភាពទិញ-លក់/ជួលឃ្លាំង និងរោងចក្រ បម្រើឱ្យវិស័យឧស្សាហកម្ម៕
